كفر الشيخ منطقة محررة - الجزء السابع( وتقريبا الأخير)ا

لم يكن معي بطاقة شخصية ، كانت في جيب الجاكت الشتوي برفقة مسبحتي السوداء ، وقد فقدتهم جميعاً في رحلة الطيران من أرض ميدان المحكمة وصولاً لسيارة محكمة الشغب ( المصفحة )..
بعد فترة جاء نفس الرجل ومعه عصابة كبيرة منهم عفيفي النجار ومحمد خميس وسألوا :
فين كريم ؟؟!!
جاوب : أنا
أنت من المحلة ؟؟!1
أيوة ...
مد يده بمطواه قرن غزال وأعطاها لأمين الشرطة الذي كان برفقته ، وقال : دي لقيناها مع الواد بتاع المحلة .
نظر لنا كريم .. والله ما بتاعتي .. قلنا له عارفين ولو اتحرزت لك الموضوع مش حيعدي ، كلنا مصير واحد ، ومش حنسمح لهم عشان انت من المحلة أنك تبقي لوحدك .
بدأوا في استدعائنا الواحد تلو الآخر ، وصرفوا ثلاث بنات و باقي ثلاثة .

كان مفاجئا لهم أننا كنا 11 فرد من 7 محافظات
2 من كفر الشيخ 2 من المنصورة
3 من القاهرة 1 كفر الزيات
1 من المحلة 1 من طنطا
1 من الاسكندرية

كان محمد خميس المحقق ( وكان يضع أمامه علي المكتب بطاقتي ، لا أدري كيف حصل عليها ) يقف خلفه رضا النويشي وكان أحمد السكران يقف ورائي .

اسمك ... وسنك ... وعنوانك ....
_ جاي من اسكندرية لحد كفر الشيخ تعمل لنا مظاهرات ..؟ ما تعمل عندكو اللي انت عاوزه ....
_ البنات محبوسة هنا مش في اسكندرية .
_ وانت بتشتغل إيه بقي ...؟؟
_ ليسانس آداب ، وبشتغل مصحح لغوي ، وباحث حر في حقوق الانسان .
_ وإيه أخبار حقوق الإنسان علي حسك ..؟؟؟
_ زي مانت شايف بنات بتتحبس ، ومواطنين بتتسحل في الشوارع ، آدي أخبار حقوق الانسان علي إيدك ..
_ وانت عاوزنا نسكت كو لما تعتصموا وتباتوا في الشارع ليلتين ، وتقطعوا الطريق ..؟؟؟؟
_ لأ .. عاوزكو بس تخرجوا البنات وبعدين اعملوا اللي عاوزينه ..
_ يا شمس أنت راجل كبير وعارف إن البلد ممسوكة بإيد من حديد ، واللي انتوا بتعملوه ده ممنهوش فايدة ،
أنت تعرف البنتين المحبوسين دول منين ...؟؟؟؟؟؟؟؟؟؟؟
_ معرفهمش .. كل اللي أعرفه إن مبادئي ما تسمحليش إني أسكت وهما محبوسين ، وكمان ياخدوا 15 استمرار ، دول مش مجرمين ...
_ مبادءك .. طيب طيب .. وانت اتجاهك إيه ..؟؟
_ أنا اشتراكي .
_ طيب ياعم الاشتراكي ، انت ليك تلت محلات إقامة غير اللي انت قلت عليه ...
_ ماليش غير العنوان اللي أنا قلته .
_ أمن الدولة في اسكندرية كان لسه معايا علي التلفون ، وقالوا إنك ليك تلت محلات إقامة تانية ..
_ طالما هما عارفين ، هما أدري ، خليهم يقولولك عليهم .
_ عاوزك انت اللي تقول ...
_ اللي عندي قلته .
_ طب خلاص .... خده .
_ لو سمحت شنطتي فيها المصحف بتاعي .. عاوزه .
_ لأ خلاص شنطتك في أمن الدولة ..
_ أنا من حقي مصحف يبقي معايا .
_ مصحف إيه أنت مش شيوعي ؟؟؟!!
_ وهوا فيه ما يمنع إني أكون شيوعي ومؤمن .. أنا عاوز مصحف .
_ خلاص ياعم الشيخ .. قلت لك شنطتك في أمن الدولة .
_ طب إديني مصحف من عندك من المكتب .
_ مافيش مصاحف... خده بقي خلصنا ..
جذبني أمين الشرطة واتنين بملابس مدنية ، وأنا أصرخ .. عاوز مصحفي ، من حقي مصحف يبقي معايا ...
دخلت علي الزملاءء, وأنا أردد نفس الكلمات ،
وإذا بجميع من في المكان ينفجر ضحكاً وأنا معهم ..

كان جميع الزملاء يستغربون إصراري علي موضوع المصحف ، ولكن السر كان إنهم جابوا بطاقتي يعني لقيوا الجاكت ، والجاكت كان فيه البطاقة ومعاها السبحة السودا ، اللي كنت محتفظ بيها من6 إبريل اللي فات (2008) ، وكان الأمن في 6 إبريل الماضي أخد مني شنطة سودا كان فيها اللافتات بتاعة مظاهرة محطة مصرومن ضمن اللي فيها سبحة خشبية كبيرة .
فكان موضوع السبحة ده تفجير لغضب السبحة اللي أكيد حد منهم أخدها مع الجاكت .
انتهي التحقيق ، مع كل فرد علي حدة ، ولم يبق سوي فتاتين ( دعاء وسارة ).
جاء جملة من العسكر علي رأسهم عفيفي النجار ، يللا هاتوهم ... توقفنا كلنا عند الباب .. تعالت الأصوات ... البنات ... البنات لازم يروحوا .
رد كبيرهم : البنات حيمشوا مش عاوزين منهم حاجة ، إحنا عاوزينكم انتو بس ..
وتبدأ مرحلة جديدة في الرحلة .ا