هذا هو الوقت الفاصل فليواجه السيف الدم ...
-- نتحرك ؟!! -- يللا ..
-- جاي ؟؟!!! -- أول واحد ..
-- لأ .. نقول البيان الأول (يسلم لسانه أسد 6 إبريل )
إحنا شباب 6 إبريل ،
جيل مصر الجاي ،
بنرفض الظلم والسرقة والفساد
، وبنقول لأ ...
لأ لحبس البنات علشان كلمة حق ..
مش حنبات في بيوتنا ، وبناتنا في الزنازين ،
إحنا رايحين علي أمن الدولة
نسلم نفسنا ونتسجن مع بناتنا ..
وللي عاوز أسامينا ...
ثم عدّ 13 اسم بدأهم بنفسه .. واللي يرفع إيده يقول اسمه ...
ملاحظة :
صاحبي ما استناش لما ارفع ايدي ، قال اسمه و بعده اسمي علي طول ( لسه حيدور .. زقني علي طول.. :):):) .)
امتدت المسيرة إلي نهاية الشارع عبرنا الطريق باتجاه مبني مباحث أمن الدولة ..
.. فجأة ..
رأيت سيارة قوات خاصة (مصفحة ) تقطع الطريق ... وقامت القيامة
انتبهت وأحد الزملاء بجانبي يضربه أربعة جنود ، وهو يقاوم فإذا به يقع علي الأرض ، تأهب أحد الكلاب لرفصه بقدمه ،جريت أدفعه عنه ،وإذا بالمفتش أحمد السكران فوق رأسي يمسك شعري بيده الغليظة ويقول :
هاتولي ابن ال..... ده .
بس ..
بلاد تشيلني وبلاد تحطني ، ومركب تجيبني ومركب توديني ..
فعلاً .. كنت أشعر فقط بما يشبه تشوش الإرسال في التلفزيون .
شعرت بالاستقرار عند باب سيارة القوات الخاصة ،
أدركت فجأة ما كان يردده لساني ..
كان طوال الرحلة يهتف :
تحيا مصر .
No comments:
Post a Comment