مش باقي مني
للتحميل
مش باقي مني غير شوية ضى في عينيا
أنا حديهملك وحمشي بصبري في الملكوت
يمكن بنورهم تلمحي خطوة تفرق معاكي
بين الحياة والموت
مش باقي مني غير شوية ضي في عينيا
أنا مش عايزهم
لو كنت يوم حلمحك
وانت يبتوطي
في معركة مفيهاش لا طيارات ولا جيش
وانتي ف طبور العيش
بتبوسي إيد الزمن
ينوِّلك لقمة
من حقك المشروع
مش باقي مني غير
شهقة في نفس مقطوع
ونا صوتي مش مسموع
يا حلمنا الموجوع
من المرور ممنوع
مستني لما يمر ....موكب سلاطينك
مش باقي مني غير شوية كفر بشروقك
علي رحمة من طينك
علي شوية صبر من دينك
مش باقي مني غير شوية لحم في كتافي
بلاش ييتبعتروا في البحر
بلاش يتحرقوا في قطر الصعيد
يوم العيد
بلاش لكلب الصيد تناوليهم
خدي اللي باقي من الأمل فيهم
وابني لي من عضمهم في كل حارة
مقام
و زوريني لو مرة وحيدة
في كل ألفين عام
....
ألم الجراح يتلم
مش باقي مني غير شوية دم متلوثين بالهم
مُرّين وفيهم سم
مش باقي مني غير شوية دم
مقدرش أسقيكي مواجعهم
وبرضه ماقدرشي
أرميكي وأبيعهم
يمكن في مرة
تطلبيني شهيد
ححتاج يوميها الدم
يمضي علي شهادتي
Monday, September 28, 2009
Subscribe to:
Post Comments (Atom)
No comments:
Post a Comment